Ineos Automotive ја проширува понудата на својот ретро теренец со новата изведба Grenadier Trialmaster X, којашто компанијата ја опишува како најспособна и најдобро опремена верзија на моделот досега.
Новата верзија е замислена како комбинација од сериозна теренска подготвеност и повеќе комфор за секојдневно возење. Во основа, Trialmaster X ја задржува грубата механика и off-road карактерот на класичниот Trialmaster, но додава дел од премиум опремата што досега повеќе се поврзуваше со Fieldmaster верзијата.
Во кабината се наоѓаат Recaro седишта со кожни детали и греење, поквалитетни теписи, safari прозорци на покривот, како и проширен пакет камери и системи за помош на возачот. Со тоа, Ineos сака да понуди модел кој не е само подготвен за тежок терен, туку е и попријатен за подолги патувања и секојдневна употреба.
Како и останатите верзии на Grenadier, Trialmaster X користи класична body-on-frame конструкција, постојан погон на сите тркала, блокади на предниот и задниот диференцијал, BFGoodrich all-terrain гуми и подигнат довод за воздух за минување низ подлабока вода.
Под хаубата се наоѓаат BMW турбо шестцилиндрични бензински или дизел мотори, поврзани со осумстепен автоматски менувач. Моделот ќе биде достапен како SUV и како Quartermaster pickup.
Со Trialmaster X, Ineos очигледно сака да им се приближи и на купувачите кои сакаат вистински теренец, но не сакаат да се откажат од удобноста и престижот. Главни ривали остануваат Land Rover Defender, Mercedes-Benz G-Class и поскапите верзии на Jeep Wrangler.
