Mercedes е подготвен да им дозволи на Џорџ Расел и Кими Антонели да се борат на патеката, но Тото Волф признава дека тимот можеби ќе мора да ја „намали“ нивната меѓусебна битка доколку ситуацијата стане преризична.
На тркачкиот викенд во Канада, двајцата возачи на Mercedes за првпат имаа вистински директни дуели, најпрво во спринтот, а потоа и во главната трка. Антонели не беше целосно задоволен од цврстата одбрана на Расел, па тимот мораше да ги разјасни правилата за меѓусебно тркање.
Во трката, борбата продолжи сè до 30. круг, кога Расел се откажа поради проблем со моторот. Пред тоа, Mercedes веќе ги предупреди двајцата возачи да бидат повнимателни, особено по моментот во 24. круг кога дојде до лесен контакт во последната шикана, а Антонели мораше да помине низ зоната за излетување.
Волф истакна дека тимот сака да им даде слобода на возачите, но не сака да дозволи ситуацијата да прерасне во внатрешна тензија како онаа меѓу Луис Хамилтон и Нико Розберг во периодот 2014-2016.
„Имаше моменти кога беше премногу блиску. Мораме да анализираме и да видиме дали треба да поставиме граници“, изјави Волф.
Расел, пак, рече дека уживал во борбата и дека одамна немал ваков дуел со тимски колега. Антонели призна дека битката била „на работ“, но додаде дека двајцата се бореле фер. Италијанецот ја зголеми предноста во шампионатот на 43 поени по четвртата последователна победа.
