Mercedes-AMG подготвува најголема моделска офанзива во својата историја, со повеќе од 27 нови возила што треба да пристигнат во следните 36 месеци. Целта е јасна: AMG сака да го намали јазот во однос на BMW M, кој минатата година постави нов продажен рекорд.
Во 2025 година, Mercedes-AMG продал 145.000 автомобили, додека BMW M достигнал 213.457 продадени примероци и забележал раст 14-та година по ред. Поради тоа, AMG планира значително проширување на понудата до крајот на деценијата, со нови бензински, електрични и performance модели.
Извршниот директор на Mercedes-AMG, Михаел Шибе, откри дека новата офанзива веќе започнала. По целосно електричниот GT 4-Door Coupe, следуваат GLE 63 и GLS 63 со нов V8 мотор со flat-plane crank конфигурација.
Во план се и повеќе специјални и performance модели. Се очекува и долгонајавуваниот Mythos модел, екстремен CLE со V8 мотор, како и помалку радикалната CLE 63 верзија. Mercedes-AMG подготвува и G63 Convertible, нов GT Black Series, како и C53 со шестцилиндричен мотор, слично на новиот GLC 53. Во развој е и електричен SUV базиран на истата платформа како новиот GT 4-Door Coupe.
Иако бројот на модели ќе се зголеми, AMG ќе го намали бројот на моторни варијанти. Наместо досегашните 10 конфигурации, понудата ќе се сведе на четири. Основата на бензинската гама ќе ја сочинуваат унапреден шестцилиндричен мотор и нов V8.
Ова покажува дека AMG нема целосно да се фокусира само на електрификација. Напротив, брендот повторно става посилен акцент на моторите со внатрешно согорување, со цел да врати дел од купувачите што во последните години се свртеа кон ривалите.
Сè уште нема официјална потврда за нов E63, иако се очекува следната генерација на E-Class да пристигне како електричен модел во 2028 година, а подоцна и со мотори со внатрешно согорување. Се споменува и можност за нов караван, што би можело да отвори простор за E63 Wagon како конкурент на BMW M5 Touring и идниот Audi RS6 Avant.
Со оваа стратегија, Mercedes-AMG сака да понуди поширок избор и да се приближи до 200.000 продадени автомобили годишно до крајот на деценијата. Иако предизвиците со регулативите во Европа остануваат, шестцилиндричните и V8 моторите засега имаат важно место во иднината на AMG.
