Mercedes-Benz прави сериозен технички пресврт со EQS за 2027 година, модел што сега ги добива токму оние унапредувања што одамна му беа неопходни за да биде поконкурентен во класата на луксузни електрични лимузини. Иако EQS и понатаму останува на постојната MEA платформа, новата верзија презема дел од најважната технологија од новата MB.EA архитектура, што значи дека освежувањето не е само козметичко, туку суштинско.
Најважната промена е преминот на 800-волтна електрична архитектура, со што Mercedes конечно решава еден од најголемите недостатоци на досегашниот EQS — релативно побавното полнење. Новиот модел поддржува полнење до 350 kW на најмоќните станици, односно до 175 kW на 400-волтна инфраструктура. Воедно, батеријата сега има 122 kWh, благодарение на нова хемија со поголема енергетска густина, а подобрено е и регенеративното сопирање.
Подобрувања има и кај погонскиот систем. Задниот електромотор добива двостепен пренос, што треба да донесе подобро почетно забрзување, но и поефикасна работа при повисоки брзини. Mercedes воведува и steer-by-wire систем со yoke управувач, иако за традиционалистите ќе остане достапна и класична механичка варијанта со кружен волан. Ова е еден од најхрабрите потези кај EQS, бидејќи токму тој може најмногу да го промени чувството зад воланот.
Во кабината пристигнува новиот MB.OS со MBUX Virtual Assistant, кој може да користи Google Gemini, ChatGPT и други AI алатки. Подобрени се и навигацијата, rear-seat екраните, паркинг асистенцијата и интелигентната контрола на амортизерите, додека надворешноста добива суптилни, но јасни измени на светлата, маската и аеродинамичните детали. Со оваа сериозна техничка ревизија, EQS конечно добива посилна основа да биде многу повеќе од само интересна електрична алтернатива во премиум сегментот.
