Британскиот производител AC Cars го одбележува своето 125-годишно постоење со нов модел што директно се потпира на легендарното наследство на Cobra. Новиот AC Cobra GT Coupe е модерна интерпретација на класичната формула: ниска каросерија, врвна изработка, голем V8 мотор и фокус на сурово возачко искуство.
Инспирацијата доаѓа од AC A98 Le Mans, уникатен тркачки автомобил кој во минатото достигнал 298 km/h на отворен автопат. Но, за разлика од тој единствен примерок, новиот Cobra GT Coupe ќе биде дел од поширок производствен план со кој AC Cars сака значително да го зголеми бројот на произведени автомобили.
Под хаубата се наоѓа 5,0-литарски Ford V8 мотор, достапен во атмосферска и supercharged изведба. Основната верзија развива 433 коњски сили и 556 Nm вртежен момент, додека посилната supercharged верзија испорачува 710 коњски сили и 820 Nm. Купувачите ќе можат да изберат шестстепен мануелен менувач или десетстепен автоматик.
Според AC Cars, автомобилот има распределба на тежината 50:50 и тежи околу 1.588 кг. Забрзувањето од 0 до 96 km/h треба да трае само 3,5 секунди, што го става овој модел меѓу најсериозните модерни спортски автомобили со класичен карактер.
Каросеријата е изработена од carbon fiber, додека основата е алуминиумска шасија. Тоа покажува дека AC Cars не сака само ретро изглед, туку модерен автомобил со вистински перформанси. Новиот производствен капацитет треба да ѝ овозможи на компанијата да го зголеми производството од околу 100 рачно изработени автомобили годишно на, потенцијално, 1.000 автомобили годишно.
Првите испораки на Cobra GT Coupe се планирани за 2028 година, а моделот ќе биде достапен со волан од левата и десната страна. Почетната цена ќе изнесува околу 315.000 долари за атмосферската верзија и околу 345.000 долари за supercharged моделот.
