Land Rover објави големо повлекување што опфаќа 250.857 SUV возила поради можен дефект кај воздушното перниче на возачот. Според извештајот на американската Национална администрација за безбедност во сообраќајот, проблемот може да предизвика воздушното перниче да не се активира при судир.
Повлекувањето ги опфаќа моделите Range Rover произведени од 2022 до 2026 година, Discovery од 2021 до 2026 година и Defender од 2020 до 2026 година.
Причината е конекторот на воздушното перниче на возачката страна, кај кој со текот на времето може да се појави корозија предизвикана од триење и вибрации. Ова може да го зголеми електричниот отпор во системот и да ја наруши комуникацијата со воздушното перниче.
Доколку проблемот се појави, на инструмент-таблата треба да се вклучи предупредувачкото светло за воздушните перничиња. Според Land Rover, предупредувањето би требало да се активира приближно 480 до 640 км пред системот потенцијално да престане правилно да функционира.
Компанијата започнала истрага во август 2025 година, откако бил забележан пораст на гарантните барања поврзани со предупредувачкото светло. Во ноември истражувачите откриле оксидација на контактите кај вратените конектори.
По дополнителни тестирања, инженерите во март 2026 година утврдиле дека нормалните движења и вибрации на возилото можат постепено да ја предизвикаат корозијата. Особено внимание било посветено на однесувањето на системот при движење по нерамни површини и при поголемо извртување на каросеријата.
За поправката нема да биде неопходно да се заменат делови. Овластените сервиси ќе нанесат специјален заштитен гел на приклучоците на воздушното перниче, со што треба да се спречи понатамошна корозија и да се обезбеди стабилен електричен контакт.
Land Rover наведува дека во САД досега нема потврдени случаи во кои воздушното перниче не се активирало поради овој проблем. Исто така, не се пријавени повреди, сообраќајни несреќи или пожари поврзани со дефектот.
