Porsche подготвува значителна промена во својата деловна стратегија, откако продажбата во последните две години забележа сериозен пад. Германскиот производител планира да го намали производствениот капацитет и да се насочи кон повисоки профитни маржи, наместо да се обидува по секоја цена да продава што поголем број автомобили.
Во 2023 година Porsche оствари рекордна глобална продажба од 320.221 возило. Сепак, слабата побарувачка во Кина, зголемената конкуренција од локалните производители и повлекувањето на Macan и 718 од европскиот пазар значително ги влошија резултатите. Двата модела престанаа да се продаваат во Европа бидејќи не ги исполнуваа најновите правила за сајбер-безбедност.
Во 2025 година испораките паднаа на 279.449 автомобили, приближно на нивото од 2020 година. Негативниот тренд продолжи и во првиот квартал од 2026 година, кога побарувачката се намали за 15%, на 60.991 возило.
Извршниот директор, Михаел Лајтерс, нагласува дека Porsche мора да остане профитабилен и со помал обем на производство. Тоа значи поголем фокус на цените, опремата и моделите со високи маржи, дури и ако вкупната продажба продолжи да се намалува.
И покрај планираното кратење на производството, понудата нема целосно да се намалува. Porsche го потврдува враќањето на спортските модели 718 Boxster и Cayman. Иако деталите сè уште не се објавени, се очекува тие да бидат понудени со мотори со внатрешно согорување и со целосно електричен погон.
Неизвесна е иднината на големиот SUV со три реда седишта, познат под кодното име K1. Моделот првично беше замислен како електричен, а потоа беа разгледувани и верзии со класичен погон. Porsche сега повторно проценува дали воопшто ќе го продолжи проектот.
Компанијата размислува и за нов спортски модел поставен врз 911, како и за гран турер, но нивната реализација ќе зависи од интересот на купувачите. Во подготовка е и нов компактен кросовер што треба да ја замени првата генерација на Macan.
За дополнително намалување на трошоците, Porsche сака подлабока техничка соработка со Audi. Новата програма за штедење треба да биде финализирана пред летната пауза, додека засега нема потврда за нови намалувања на бројот на вработени.
