Mazda повторно ја доработи актуелната генерација на MX-5 Miata, но овојпат промените не се направени за подобри перформанси или посвеж изглед. Новите правила за надворешна бучава во Јапонија го принудија производителот да го направи популарниот роудстер потивок за да може да продолжи да го продава на домашниот пазар.
Четвртата генерација, позната како ND, се произведува речиси 12 години и досега доби повеќе технички подобрувања и специјални изведби. Иако Mazda веќе работи на нејзиниот наследник, актуелниот модел ќе остане во понудата уште некое време.
За исполнување на построгите стандарди, инженерите поставиле потивки гуми, поголем издувен пригушувач и направиле промени во системот за довод на воздух. Кај верзијата RF со тврд покрив, поголемиот пригушувач зафаќа дополнителен простор, поради што длабочината на ионака малиот багажник морала да биде намалена.
Промените се неопходни поради третата фаза на јапонските прописи за бучава, усогласени со меѓународниот стандард UN R51-03. Од јули тие ќе важат и за веќе постојните модели, а дозволеното ниво на бучава се намалува на 68 до 72 dB, зависно од односот меѓу моќноста и масата на возилото.
Без овие интервенции Mazda повеќе не би можела да ја продава MX-5 во Јапонија. За споредба, претходната фаза дозволувала од 70 до 74 dB, додека првичните правила имале граница од 72 до 75 dB.
Паралелно со техничките измени, Mazda ја претстави и специјалната MX-5 Pure Sport за јапонскиот пазар. Таа доаѓа со 1,5-литарски мотор, новата Zinc Green Metallic боја, сив платнен покрив и црни 16-инчни Rays тркала.
Моделот добива и Brembo сопирачки со сребрени клешти, Bilstein амортизери и седишта обложени со материјал сличен на велур. Во кабината има црни детали околу копчето за стартување, контролите за климатизацијата и отворите за вентилација.
